DAFTAR LAGU

1. DEGUNG SUNDA MEKAR
   
2. PAPATET 
   
3. PANGAPUNGAN
   
4. DEGUNG PANGGUNG
   
5. JEMPLANG PANGATEN
   
6. PAMIRIG - J. CIDADAP
   
7. JEMPLANG TITI   
   
8. DEGUNG UJUNG LAUTAN 
   
9. BAYUBUD-LIWUNG-TEGAL      
   
10. DEGUNG MANGU-MANGU  
    
11. SINOM DEGUNG
    
12. DANGDANGGULA  DEGUNG      
    
13. PANANGIS DEGUNG      
    
14. DEGUNG PUTRI LAYAR    
    
15. DEGUNG MANINTIN    
    

PANGJEJER

DPKLTS

Hj. Tuti Karman Somawidjaja

Chandra Maulana, SE

Penembang

Hj. Tuti Karman Somawidjaja

Dadan Endoe S. Apandi

Hj. Ayi Satrianah Bustomi

Nunung Sunarti Endoe S. A

Iceu Ali Djajakoesoemah

Eti Ali Djajakoesoemah

Hj. Mulyati (almh)

Tata Sutaryat, S.Si

Pamirig

Tata Sutaryat, S.Si (Kacapi Indung)

Asep Bambang P (Suling)

Dadan Endoe S. A (Suling Instrumental)

Dadang Mulyana (Kacapi Rincik)

RUMPAKA

mpi raratan yen Cianjuran teh ngandung 

ma'na Cai Anjuran ti luluhur 

anu karagungan 

cipta, karya, karsana 

kanggo wariskeuneun, 

tawis asih ka seuweu-siwi, 

malar parendak sareng 

jiwa kasundaanana. 

Dina hartos 

wawuh ka isunna 

kenal ka Pangeranna.  

Saur para kasepuhan, 

beh ditu-dituna mah 

ieu seni waris teh disebat 

seni waris Tembang Pajajaran 

anu ngandung 

jiwa sareng falsafah 

ka-Siliwangi-an,

silih asah, silih asih jeung silih asuh. 

Dina taun 1834 -1862 

ieu budaya waris teh 

kantos digugah 

sareng dikembangkeun 

ku yasana 

Dalem Pancaniti (R.A.A Kusumahningrat) 

anu janten Bupati Cianjur harita.

Dumasar kana hal eta, 

Mimitran Tembang Sunda 

seja ngaguar tutungkusan karuhun, 

midangkeun 

Tembang Waris Padjadjaran !

Lenyepanna:

Niat rek ngaji maca sarsilah diri 

mayunan nu Kagungan Hirup, 

manjing dina: 

“Iqro bismi Robbikalladzi kholaq”. 

Maca dadamelan Kersana 

anu aya dina sapaparat jalan kahirupan, 

dina kujur tangtung diri, 

dina kalangkangna rasa. 

Nya kabukana anging 

ku nu tareuleum (ngacapang/ngawih) 

dina setraning rasa, 

rasa jatining kawula. 

Nu di'aub ku kaakbaran Pangeran 

(dilingkung Gunung), 

nu ngancik dina 

wadah Kahyangan (wahangan).

Janten tetela seni Cianjuran teh lain saseni senina, 

seni anjuran para Luluhur nu luhung. 

Kari urang nu nampina sing boga rasa rumasa. 

Lir buah asak di tangkal, na saha nu melakna? 

Urang ngan kari ngalana, 

henteu terang dihesena.

Cag.

NEULEUMAN UNGKARA RUMPAKA

Dina ngajugjugan lagu-lagu dina 3 laras sareng 4 wanda teh, sajabi tiasa kapendak dina laguna, oge tisa kapendak dina lirik (rumpaka) anu sajiwa, safalsafah sareng saajen dina kualitasna. Urang papay dina laras Pelog, wanda Pantun, nyaeta lagu pamuka lawang saketeng, diawitan ku:

Narangtang:

Bukakeun panto bangongong

 jalan gede sasapuan

nyanggakeun balungbang timur 

caang bulan opat welas.

Lenyepanna: 

Diawitan ku mukakeun panto kalbu salebar-lebarna, 

meresihan jiwa malar caang padang narawangan.

Diteraskeun kana lagu: 

Papatet:

Amit rek ngawih saeutik 

sarsilah Aji Batara

nya pondok beunang miloko 

panjang beunang ngungang-ngungang

ditulisna dina gebang 

dina gebang sewu lontar

 di teundeun di sisi jalan

dina iuh-iuh tanjung

 Dina kalangkang katapang

ku paraji mo kabukti

ku pandita mo kabuka

kabuka ku nu ngacapang

kapanggihna ku nu ngawih

sarsilah ti Pajajaran

 dayeuh dilingkung ku gunung

 pernahna sisi wahangan.

TEHNIK TETEMPATAN SORA

Ngajugjugan jiwa lagu dina 3 laras sareng 4 wanda

 mamaos Cianjuran teh kedah kateuleuman 

ku tehnik tetempatan sora. 

Dina asuhan para Kasepuhan anu uninga 

kana sedongan-sedongan rasa, 

anu tiasa ngebrehkeun tetes jiwa laguna 

dina tatanan laras sareng wandana.  

Binaan anu kacida abotna 

upami teu disarengan ku kasabaran sareng kauletan, 

boh guruna  boh muridna. 

Kirang-kirangna mah 

seueur anu boboleh ditengah jalan.

Padahal tehnik tetempatan sora teh mangrupi 

binaan anu mutlak kedah kapendak 

kanggo ngahontal anu janten jugjugan 

seni mamaos ieu.  

Nyaeta milari kamurnian sora 

anu kaluar tina kamurnian jiwa anu nembangna.  

Bijil tina jati dirina, 

anu janten tujuan utama dina seni waris ieu, 

jalan kanggo panggih jeung dirina, 

pendak sareng Pangeranna. 

Sapertos dina ungkara nu kaunggel dina wangsit:

Sora teh titipan rasa

ari rasa bejana jatining kula

ari kula eta kaulaaneun

Rasaning rasana kula

rasa kula permana Allah

eta ayana dina kalemesan rasa

dina rasa anu sabiasa

dina rasa anu “dua”  tunggal sarasa

CIANJURAN

KAJIAN 

(Hj. Tuti Karman Somawidjaja) 

LARAS SARENG WANDA TEMBANG CIANJURAN

Visi sareng misi Tembang Cianjuran digambarkeun dina 3 Laras sareng 4 Wanda: 

1.   Laras Pelog

Mangrupa gambaran visi kajian hirup anu ditata dina 4 wanda (tahapan),  nyaeta:  

a.   Pantun 

Ngajugjugan hakekat diri dina kahirupan nemonan Nu Maha Nyipta, 

Mahluk ka Nu Maha Kholikna.  Ngajugjugan sajatining diri malar wawuh ka Pangeranna. “Man arofa nafsahu, faqod arofa Rabbahu”  (Lamun geus nyaho ka dirina, tangtu bakal nyaho ka Pangeranna). Tetempatan sorana disimpen dina sedongan rasa anu paling jero, mangrupi sora dasar dina tahap ka-1 (hiji).

b.   Jemplang 

Ngagambarkeun rencana-rencana jeung harepan pilakueun hirup, malar puguh nu dijugjug dina karidhoan Nu Maha Murah tur Asih.  Tetempatan sora dina tahap ka-2 (dua).

c.   Rancag

Tetempatan sora dina tahap ka-3 (tilu) anu eusina cumeluk, umajak hirup kumbuh jeung papada kawula, babarengan dina kahirupan anu luyu dina; “Rahmatan lil 'alamiin”.

d.   Degung

Tetempatan sora dina tahap ka-4 (opat), anu lantunan sorana bebas leupas nyawang adeg-adeg kaakbaran Nu Maha Agung anu kagungan cipta, dadamelan dina alam semesta anu tan wilangan sareng tan wangenan.

2.  Laras Sorog

Jiwa anu keur ngoteteng neangan jalan pikeun wawuh kadiri anu sajati, malar pendak sareng Nu Maha Nyiptana.  Tina laras pelog nyorog kana laras salendro, nyieun tetecean neangan hambalan geusan mukakeun lalangse diri.

3.  Laras Salendro

Jiwa anu parantos kabuka (Mukasyafah) kana kajian hirup, 

saperti nu kaunggel dina lagu Sebrakan Sapuratina.

Laras salendro cocok kanggo penembang anu fitrah (bakat) dina jiwa salendro. Penerapannana langkung umum didugikeun ku Dalang nuju ngawayang. 

Ibarat Maha Khalik ngatur mahlukna anu teu daya teu upaya. 

Paling henteu tiasa oge diterapkan dina pidangan Gending Karesmen, 

dina jiwa raja anu pinuh ku wibawa cumeluk ka rahayatna.